祖記主勝拉唔住

2020-07-20 09:53:20 来源:网络

金靴對決信C朗決心
今晚意甲爆激戰,1哥祖雲達斯主場硬撼拉素。今仗亦係兩大射手正面交鋒,祖記王牌C朗腳風堅順,相反拉素箭頭恩莫比尼近期立晒油,高下立見,C朗為爭金靴唔會留力,加上祖記主場出擊食住拉素,強捧主勝。(myTV Gold 301、Now 638、有線654、614、661及601台周二凌晨3時45分直播)

查實兩軍近況唔多掂頻頻失分,祖記近3仗不勝,拉素仲衰,近4仗只得1和3負,由第2位跌到落第4。不過單睇射手表現兩隊就有天壤之別,C朗復賽後7仗入7粒,只得1仗食白果,更重要係佢有爭標決心,反而喺射手榜以29球領先嘅拉素箭頭恩莫比尼,連續3仗冇波入,C朗追到只差1粒,佢為首捧意甲金靴,餘下幾仗必定盡力數胡。

沙利保飯碗唔衰得
雖然祖記近期發波瘟,但多得拉素同國米唔爭氣,令佢哋喺榜首仲有優勢,不過始終冠軍未到手,為免夜長夢多,祖記自然想盡快贏波止跌,有傳若然輸畀拉素,主帥沙利就會飯碗不保,改由即將回巢接掌U23嘅名宿派路,直接接管一隊,沙利為保飯碗自然唔衰得。祖記近6次主場對拉素贏5次,擺明格食格,何況今季兩度碰頭都輸畀拉素,今晚復仇戰冇面畀,主勝有買趁早。