C朗恩莫比尼金靴爭崩頭

2020-07-29 11:18:27 来源:网络

祖記拉素今晚分途出擊
雖然意甲冠軍已塵埃落定,祖雲達斯實現9連冠霸業,但唔代表今晚賽事冇睇頭,因為兩大射手C朗與恩莫比尼仲要爭金靴。其中祖記作客卡利亞里,王牌C朗仍落後拉素箭頭恩莫比尼3粒,難得遇弱必趁機數胡,客勝有計。(myTV Gold 301、Now 638、有線654及614台周四凌晨3時45分直播)

祖雲達斯日前主場以2比0擊敗森多利亞,喺剩餘2輪聯賽下,領先次席國際米蘭7分,提早奪得聯賽冠軍,並連續9季成為意甲盟主,氣勢強勁。王牌C朗對森多一役亦入1粒,今季聯賽已累積31球,追平傳奇人物布利來喺1933至34年球季所創下紀錄,成為祖記史上單季聯賽最多入波球員之一。C朗只要今場再有進帳,即可以打破前輩紀錄,呢位葡萄牙球星於射手榜落後拉素前鋒恩莫比尼3球,為從後趕上搶金靴,鬥心唔使懷疑。

祖記對賽食住卡利亞里
卡利亞里既無降班威脅,亦無力爭取歐洲賽資格,戰意成疑;中場主力尼恩高蘭更因傷倦勤,實力受削,上場以0比1不敵烏甸尼斯後,近8場聯賽僅得4和4負,正宗風流波不宜高估,加上近7次聯賽碰頭,祖記唔單止贏晒,其中6次更加贏2球或以上,今季首循環大勝4比0,C朗更大演帽子戲法,今仗再遇「私房菜」必盡情數胡,客勝冇走雞。

拉素炒得起布雷西亞
至於早少少開波嘅拉素,喺主場迎戰布雷西亞。拉素上仗大勝維羅納5比1,恩莫比尼連中三元弗到爆。布雷西亞已篤定降班,成班球員冇晒戰意,上場又輸畀帕爾馬1比2,近4場聯賽作客更加全敗,合共失咗18粒,包括對兩支前列強隊國米及阿特蘭大,合共失咗12粒堅恐怖,今場造訪拉素隨時大敗,直取讓球主勝。(myTV Gold 301、Now 638、有線654及614台周四凌晨1時30分直播)