拜仁鬥馬賽玩大佢

2020-07-31 11:05:45 来源:网络

羅拔仔獲Goal老師過料
今晚有場具睇頭嘅熱身賽,德甲盟主拜仁慕尼黑於自家青年隊球場,迎戰法甲勁旅馬賽。雖然德甲已收咧,但拜仁仍有歐聯任務,因此要靠「拍跳」 Keep住狀態,弗到爆嘅射手羅拔利雲度夫斯基更加得到「Goal老師」高路斯指點,隨時更Sharp醒,加上馬賽近期熱身賽入得又失得,隨時合演入球騷。

(myTV SUPER周五晚10時直播)

拜仁啱啱完成德甲8連冠霸業,但佢哋仲有歐聯征程,16強首回合大勝車路士3比0,嚟緊8月頭要踢次回合,預計晉級機會極大,意味拜仁去到8月仲會好忙碌,因此經過短暫休息後,話咁快就復操,迎接歐聯同嚟緊聯賽開咧。

主帥漢斯弗利克強調對「車仔」唔可以大意,希望盡快操起狀態,而新季佢又多咗位助手幫手,就係從二隊提升上嚟嘅高路斯;呢位世盃決賽周史上入波最多嘅前德國國腳,主力負責指導前鋒,據報完成操練後,佢特登同射手羅拔利雲度夫斯基加操,進行射門訓練同畀建議佢,相信上季德甲金靴得主「羅拔仔」獲益良多。

利萊辛尼有望登場
拜仁喺今夏成功簽入曼城翼鋒利萊辛尼,雖然佢冇份踢歐聯,但預計今仗會披甲,再加上基拿比、哥列斯卡支援「羅拔仔」,勢必火力全開。不過弗利克亦收到個壞消息,主力後衞班捷文柏華特因傷要抖4至6周,今仗熱身賽同歐聯對車路士肯定唔使預佢,或影響防線穩定性。

另一邊廂,由於上季法甲因疫情而中途腰斬,令當時排第2嘅馬賽取得亞軍及下屆歐聯入場券。而且馬賽早前仲收到喜訊,就係王牌皮耶落實減薪續約至2024年,堅係有情有義。睇番馬賽近3場熱身賽狂轟12粒,但場場都有失波,入得又失得,造訪對上7仗有6次開3球或以上嘅拜仁,肯定多波入啦。