些路迪大盤嗒得諾

2020-08-09 10:34:42 来源:网络

奧辛尼艾度亞迪撻着
今晚蘇超直播戲碼,班霸些路迪作客基爾馬諾克。「綠白兵團」開咧戰即大開殺戒,前鋒奧辛尼艾度亞迪更加着晒火,撞正「私房菜」基爾馬諾克要贏唔難,但客W冇肉食,轉捧2.5球嘅大盤好過。

(myTV Gold 302、Now 639、有線655及615台周日晚11時30分直播)

基爾馬諾克未改脫腳陋習
基爾馬諾克首輪1比2不敵喜伯年,球員明顯未操起。事實上基爾馬諾克近幾季都開季即脫腳,慢熱毛病不改,未計今仗,佢哋近8季聯賽頭兩輪15場波,只得2勝3和10負,見到都唔開胃,今晚縱有地利相信亦難逃厄運。

聯賽9連霸嘅些路迪,上季因疫情導致聯賽腰斬,增加咗佢哋嘅爭勝欲望,首輪即狂數咸美頓5比1,奧辛尼艾度亞迪大演帽子戲法勁搶鏡,查實呢位法國前鋒喺上季各項賽事入咗28粒,有傳畀阿仙奴睇中,證明真材實料。

今晚兩軍狀態一高一低,「綠白兵團」贏波係基本要求,不過客W得1.11倍冇肉食,讓球主客和要讓兩球,即係贏3粒先收錢,較為冒險。睇番兩軍近3次交手,些路迪贏晒之餘,全開3球或以上,2.5球入球大係更好選擇。

格流身心俱疲半場和味濃
另一班霸格拉斯哥流浪早啲登場,主場迎戰聖美倫。「格流」上周中剛喺歐霸畀利華古遜淘汰出局,匆匆再戰身心俱疲;聖美倫實力稍遜,但開鑼戰靠後衞李察泰特入波,一球小勝利雲斯頓,隊波士氣唔曳,加上簽入羅斯郡隊長中堅馬古斯費沙,防線更值信賴,半場可望頂到唔輸,半和有計。

(周日晚10時開賽)