神鋒對決蔚山大盤有邱勢

2020-09-12 11:11:28 来源:网络

周六韓職大戰,聯賽1哥蔚山現代主場迎戰FC大邱,雙方均以進攻火力強勁見稱,加上隊中神鋒祖利亞尼加奧同費蘭度施仙夏狀態正處巔峰,預料會有大量入波出現,中位數2.5球入球大要捧場。(無綫85台周六晚6時直播)

大邱前後脫節冇得守
蔚山目前領先全北汽車5分,爭冠形勢相當理想,上輪雖然只能逼和FC光州,但其實全場狂攻,錄得22次射門紀錄,巴西射手祖利亞尼加奧亦有入球,近3場聯賽入4球,累積22球喺射手榜一支獨秀。事實上,蔚山近期加強輪換,挪威射手比安莊臣上陣時間增加,表現愈嚟愈好,李青龍、尹比加林等主力亦有喘息機會,相信有助維持高水平演出。

作客嘅大邱近5場聯賽只得1分,不過佢哋憑住季初好表現,仍然好大機會躋身爭標組。大邱依家最大問題係隊長洪正雄、前鋒艾格般奴長期養傷,導致後防冇人喝住指揮,同前場斷成兩截,形成中場失勢防守力弱,近2場聯賽合共失9球,加上守將趙珍友今場又要停賽。球隊唯一依靠就係巴西前鋒費蘭度施仙夏,佢已經連續2場聯賽梅開二度,暫以12個入波同伊祖辛高並列射手榜第2位,呢場波「有前冇後」嘅大邱想尋求搶分機會,就只能夠靠佢數胡,入球大要撐。