熱刺搶胡主W要愛

2020-09-13 12:30:20 来源:网络

寸王針對性收購堅啱使
今晚英超壓軸尾場,熱刺喺主場迎戰「拖肥」愛華頓,雙方主帥摩連奴及安察洛堤大鬥法。熱刺勒緊褲頭冇得大事增兵,不過「寸王」作出兩個針對性收購,相信會令球隊有所提升,反而愛華頓臨開咧前先係咁買人,占士洛迪古斯等新兵根本未夠時間磨合,加上摩連奴開咧戰特醒,主勝值得捧場。(Now 621周日晚11時30分直播)

貴為一代名帥,摩連奴同安察洛堤嘅關係都幾微妙,既因分別執教米蘭雙雄而成為死對頭,「肥安」亦喺摩連奴打下基礎後,接手車仔同皇馬獲得成功,有啲「行運醫生醫病尾」feel。當然佢哋近年都有回塘迹象,「寸王」執教曼聯嗰陣備受抨擊,「肥安」上一份工就畀拜仁炒魷魚,兩人均不惜紆尊降貴執教多年無冠嘅熱刺及「拖肥」,都係想喺英超重新證明自己。

因疫情令收入大減,令摩連奴冇得好似教皇馬、曼聯咁大灑金錢買人,不過今夏購入賀積查治同馬特杜靴迪,前者屬為「寸王」最鍾意嘅「打仔格」中場,呢位丹麥國腳既可作防線前屏障,亦能串連攻守,馬特杜靴迪作為右翼衞做到瞻前顧後,效率極高,解決自捷比亞上季離隊後,熱刺右路攻守問題。唔好忘記,前線嘅哈利卡尼同孫興民,係英超最具殺傷力嘅進攻組合之一,熱刺近乎原班人腳出戰,默契十足。

「肥安」喪買人愛華頓未磨合
相反,愛華頓主帥安察洛堤今夏着力建立自己班底,近日接連羅致杜哥利、阿倫盧利奧及「J神」占士洛迪古斯,「J神」仲要係免費,大家都等睇「肥安」點樣重新激活呢位2014年世盃金靴得主,佢哋質素唔錯,但問題係加盟冇耐,夾都未夾過,仍需時間適應,好難即刻發揮作用。

睇番熱刺近3季聯賽開鑼戰全勝,雖然3戰均非摩連奴領軍,但「寸王」好要面唔衰得,何況佢執教曼聯及兩教車仔期間,曾9次領軍打聯賽開咧戰,豪取8勝1和佳績,可見摩帥好重視開咧戰。加上近4次同「肥安」正面交鋒都贏波,包括上季季尾熱刺主場1比0小勝「拖肥」,今仗有力打響頭炮。