列斯聯曼城大鬥法

2020-10-03 10:44:32 来源:网络

崇尚進攻等睇入球騷
「性感足球」代表列斯聯周日凌晨主場迎戰曼城!由「狂人」比爾沙執教嘅列斯聯,以悅目踢法吸引唔少球迷注意,今場撞正上季射入102球嘅曼城,隨時又會大手交易,況且兩隊開季防守力都麻麻,中位數3.5球入球大捧得過。(Now 621周日凌晨零時30分直播)

列斯聯升班之後,依然冇改變性感踢法,英超開季首2戰均開出總入球「7+」,開咧戰作客不敵利物浦3比4,其後主場鬥同為升班球隊富咸,調番轉以4比3贏波,夠晒精彩。佢哋上場聯賽雖然只係小勝錫菲聯1比0,但計埋錄得聯賽2連勝,一班球員明顯已經站穩陣腳,建立起信心。

列斯聯領隊比爾沙喜用進取型陣式,中場線開始以高位逼搶,並且於進攻時互相走位配合,陣中多名球員均具備入球能力,波蘭中場基列治及葡萄牙中翼鋒希達哥斯達已經分別射入2球,前鋒班福特腳風亦順,面對近期防守頻頻出現漏洞嘅曼城,有望再度取得入球。

防線甩漏未解決
曼城上輪聯賽大敗,主場以2比5不敵「狐狸」李斯特城,開出總入球「7+」,3名後衞基爾獲加、艾利加西亞及班捷文文迪輪流犯錯連累「藍月亮」輸12碼,似乎困擾曼城多年來嘅後防問題,仍未可以徹底解決。領隊哥迪奧拿都冇晒計,依家可以做就係吩咐球員盡量爭取入球,希望可以抵銷後防錯誤,以史達寧、奇雲迪布尼及菲爾科頓組成嘅攻擊鋒線,夾慣夾熟有質素,要入多幾球冇難度。

周中英聯盃對般尼一仗,曼城多位主力請纓落場,結果大勝3比0,一掃大敗於「狐狸」腳下悶氣,預料今仗即使作客都會搶攻,遇上娛樂性踢法嘅列斯聯,相信又係一場入球盛宴,入球大咪錯過。