愛華頓弗爆勢擒海鷗

2020-10-03 10:45:23 来源:网络

今晚英超仲有3哥愛華頓主場迎戰「海鷗」白禮頓。愛華頓王牌占士洛迪古斯極速融入,益晒射手卡維特利雲士哥不斷,創下球隊82年來最佳開季紀錄,單計聯賽已3連勝弗到震,加上佢哋喺主場專恰「海鷗」,有力保持連捷強勢,主勝有計。(Now 621周六晚10時直播)

愛華頓喺名帥安察洛堤帶領下,今季簽入占士洛迪古斯、杜哥利及阿倫盧利奧,戰鬥力全面升呢。其中「肥安」愛將占士洛迪古斯迅速融入球隊,不斷為「雙箭頭」李察利臣及卡維特利雲提供數胡機會,難怪連盃賽在內,「拖肥糖」連贏6場,成為佢哋自1938年後首次開季6連捷,亦係27年來首度開季聯賽3連勝。卡維特利雲今季5次披甲入8粒,其中兩次大演帽子戲法,腳風順到冇朋友,睇得出「肥安」功力深厚。

黑仔白禮頓3訪全敗
相反,白禮頓開季3場聯賽只得1勝2負,上場聯賽戰至球證吹完場雞都仲係打成2比2,點知畀VAR發現馬奧比喺禁區犯手球而輸12碼,最終以2比3不敵曼聯,呢場波「海鷗」5度射門中柱或中楣,單係中場李安度杜沙特就佔咗3次,真係黑到冇朋友。翻查紀錄,愛華頓近3次聯賽主場對白禮頓贏晒,依家戰力再升級,必定力爭聯賽4連勝,主勝咪走寶。