車路士認真Mode大反擊

2020-10-03 10:45:55 来源:网络

倫敦打吡迎水晶宮
今晚英超頭場上演「倫敦打吡」,車路士主場迎擊水晶宮。車仔上場聯賽作客西布朗幾乎輸波,今場唔敢再大意,不過水晶宮近2場鬥曼聯、愛華頓已充份證明具反擊本錢,雙方近5季於史丹福橋交手有4次開3球或以上,今場首選2.5球大盤。(Now 621及611周六晚7時30分直播)

今季大事擴軍嘅車仔,因變動太多磨合需時,導致開季表現不穩,繼次輪淨吞利物浦兩蛋後,上場聯賽因馬高斯阿朗素、堤亞高施華等守將連番犯錯,半場落後西布朗0比3,幸好易邊後換入赫臣奧杜爾收到奇效,憑住佢同美臣蒙特、譚美阿巴謙各入1球,最終逼和3比3保住1分。去到周中英聯盃,佢哋喺領先1球情況下,被熱刺追和1比1,最後更射輸12碼被淘汰,足證目前車仔攻強守弱,前面入埋唔夠後面輸。

水晶宮連場有士哥
另邊廂,水晶宮開季聯賽兩連勝後,上場輸畀今季表現突出嘅愛華頓,技不如人無話可說,不過佢哋今季3場聯賽都有入波,包括作客3比1擊敗曼聯,反映佢哋反擊相當有威脅。水晶宮近5季聯賽作客車仔取得3勝2負,其中只有1次冇入波,4次開3球或以上,戰況絕非一面倒,趁車仔目前防線不穩有力爭取士哥,今場捧大正路。