馬體會贏卡士熱捧主勝

2020-10-03 10:46:35 来源:网络

黃色潛艇戰力未成形
周六晚西甲重頭戲,馬德里體育會主場鬥維拉利爾。馬體會今季陣容變化唔大,加入烏拉圭前鋒蘇亞雷斯後如虎添翼,相反維拉利爾簽入唔少新球員,新帥艾美利重返西甲後亦需時重新適應,上次作客巴塞隆拿半場已淨吞4蛋,面對同級嘅馬體會凶多吉少,熱捧主勝。(Now 632周六晚上10時直播)

馬體會今季沿用去季主力班底,除前鋒艾華路莫拉達外借祖雲達斯之外,迪亞高哥斯達、祖奧菲歷斯、沙奧尼古斯同奧比歷成條骨幹都留隊,而且仲正式買斷上季以借用形式回巢嘅比利時國腳恩歷克卡拉斯高。當然最重要一步,係從巴塞隆拿羅致王牌前鋒蘇亞雷斯,呢位烏拉圭射手上周末聯賽首次後備上陣,即交出2個入波同及1次助攻,協助球隊大勝CF格蘭納達6比1,盡顯卡士,今次再喺主場出戰可望繼續數胡。

誠然,馬體會守衞荷西基文尼斯因感染新冠肺炎,今場只能夠喺屋企睇波,但係佢哋自2017年球季起計,主場3戰維拉利爾取得2勝1和未輸過,而且入6球只失2球,地利優勢非常明顯。

維拉利爾新兵多欠默契
維拉利爾今季有老將辛迪卡索拉離隊,補入日本新星久保建英、華倫西亞孖寶柏利祖及高基連,個人質素同兵源有增無減,而且邀得以往執教華倫、西維爾都拎到唔錯成績嘅艾美利掌舵,成績令人期待。不過因為新兵太多,「黃色潛艇」默契仲有待改進,球員同教練之間亦需時磨合,呢艘潛艇仲未形成戰鬥力。上周作客巴塞慘敗0比4嘅維拉利爾,周中以3比1輕勝艾拉維斯,不過後者實力麻麻,尤其馬體會地頭出戰格外醒神,跨季近6場聯賽主場5勝,今場主勝值得熱捧。