AC米蘭主場屠雌狼

2020-10-26 10:37:23 来源:网络

「戰神」伊巴謙大勇
今晚意甲獨腳戲,1哥AC米蘭主場火併羅馬。AC全面復甦,「戰神」伊巴謙莫域更擺脫肺炎浴火重生,上輪打吡贏波有辦你睇,挾開咧聯賽4連勝之勢,唔怕時好時壞嘅羅馬,主勝有計。(myTV Gold 301周二凌晨3時45分直播)

其實AC翻生有迹可尋,早喺上季復賽後已嚟料,喺最後12輪取得9勝3和不敗佳績,包括擊敗祖記、拉素同今仗對手羅馬,鎖定歐霸入場券,嚟到今季keep住氣勢,連盃賽在內7場正式賽事,法定時間豪取6勝1和,包括開季聯賽4場贏晒,上輪更喺同市打吡勇挫國際米蘭2比1,啱啱從新冠肺炎中康復嘅伊巴謙莫域獨建兩功,猶如火鳳凰重生。呢位老大哥唔單止喺今季已有5粒進帳,仲係主帥與球員間嘅橋樑,憑經驗帶住辛度東拿利、巴謙戴亞斯等新仔,收到效果。

羅馬傷兵多未受考驗
另一邊廂,「雌狼」羅馬連盃賽近3仗全勝,睇落幾醒,不過對手只係烏甸尼斯、賓尼雲圖及年青人之流,而且陣中仍有史摩寧、卡拉科利、基安盧卡文仙尼及尼高路辛尼奧路養傷,最近2次造訪聖西路球場都敗走,不宜高估。值得一提嘅,係AC唔單止係今季歐洲5大聯賽唯一全勝球隊,連埋上季在內,佢哋近10場嘅場均入球達2球或以上,係自1964年以來首次,單計今季已有10名球員有入波,攻擊點眾多,令對手防不勝防,寧買當頭起,主勝咪走寶。