曼聯地頭慌失失捱細界

2020-10-28 10:58:29 来源:网络

歐聯H組重頭戲,曼聯主場迎戰RB萊比錫。曼聯今季表現反覆,主場仲未開齋;至於有迪姆華拿離隊嘅萊比錫依家做緊德甲1哥,防守比以往有顯著進步,今季踢7場只失3球,預計今場入波唔會多,首選2.5球入球細。

(Now 644、有線656及616台周四凌晨4時直播)

萊比錫鐵桶防守穩
雙方首輪分組賽皆旗開得勝,曼聯作客以2比1擊敗巴黎聖日耳門,今屆歐聯有個好開始,不過球隊上場聯賽返主場只能悶和車路士0比0,今季3場主場賽事只獲1和2負,今仗鬥萊比錫係歐聯主場第1戰,壓力反而仲大過作客。由於有3分喺袋,預計今場紅魔鬼領隊蘇斯克查都會穩字行先,搵費特洛迪古斯同麥湯米尼踢雙防中,前面由般奴費南迪斯「打骰」。

萊比錫係上屆歐聯4強分子,今季雖然放走首席射手迪姆華拿,但成績冇太大影響,今季喺防守上表現更為出色,聯賽連盃賽近7戰6勝1和,只失3球,包括首輪分組賽以2比0擊敗巴沙克舒希。今場作客出線假想敵嘅曼聯,預計都會踢得好小心,曼聯近5場歐聯分組賽連淘汰賽主場僅1勝,當中4場未能取得士哥,5場全開2球或以下,今戰捧入球細為妙。