多蒙特顯辛手鑊氣夠

2020-10-28 10:59:59 来源:网络

歐聯F組次輪賽事,多蒙特主場迎戰辛尼特。雙方首輪同樣落筆打三更,為保出線機會必力爭贏波3分,「蜜蜂兵團」啱啱喺打吡戰大勝,挾歐聯主場3連勝之勢,無懼客場腳軟嘅辛尼特,讓1/1.5球照捧上盤。

(Now 645及有線603台周四凌晨4時直播)

辛尼特作客腳軟
多蒙特首場分組賽出師不利,作客拉素輸1比3,好在佢哋日前返回德甲出戰魯爾區打吡,主場以3比0大勝死敵史浩克04,重拾信心。其中挪威新星艾寧夏蘭特弗到漏油,連續2場都有士哥,而且「蜜蜂兵團」上屆歐聯4場主場獲3勝1和,除咗首場分組賽同巴塞隆拿互交白卷外,跟住3場連贏國際米蘭、布拉格斯拉維亞同巴黎聖日耳門,主場出擊有保證。

辛尼特喺首場歐聯分組賽主場1比2輸畀布魯日,相比對手名氣、主客場因素,辛尼特輸波比多蒙特更令人失望,而且辛尼特上場聯賽再喺主場慘遭滑鐵盧,面對中游嘅魯賓卡山亦輸1比2,開季聯賽主場5連勝亦斷纜,信心受挫,加上呢支俄超班霸喺歐聯客場出擊例腳仔軟,近5場歐聯作客僅得1和4負,包括上屆分組賽輸畀另一支德甲球隊RB萊比錫,多蒙特可趁機追打客場蟲搶分,上盤有計。